अमेरिकामा १ करोड अवैध आप्रवासीलाई नागरिकता !

माघ १७ – अमेरिकी राष्ट्रपति बाराक ओबामाले देशको समग्र आप्रवासन प्रक्रियामा परिवर्तनको समय आएको बताउनुभएको छ । सांसदहरुको एक समूहले आप्रवासन नीति पुनर्संरचनाको खाका तयार गरेको भोलिपल्ट सार्वजनिक कार्यक्रममा बोल्दै राष्ट्रपति ओबामाले जनभावनाको सम्मान र आप्रवासन नीतिमा व्यापक सुधारको समय आएको बताउनुभएको हो । ह्वाईट हाउसको संलग्नतामा सिनेटरहरुले १ करोड भन्दा बढी अवैध आप्रवासीलाई नागरिकता दिलाउने गरी आप्रवासन नीतिमा सुधार गर्ने खाका तयार गरेका छन् । जसअनुसार कुनै कागजात बिना अमेरिकामा बस्दै आएको व्यक्तिले नागरिकताको अवसर पाउन आफ्नो पृष्ठभूमि जाँच गराउनुपर्ने, अङ्ग्रेजी जानेको हुनुपर्ने र अवैध बसाईका लागि जरिवाना तिनुपर्ने छ । त्यसपछि पनि त्यस्ता व्यक्तिलाई वैध रुपमा अमेरिका जाने प्रयासमा रहेकाहरु पछि मात्रै प्राथमिकतामा राखिनेछ । अवैध रुपमा अमेरिकामा बसिरहेकालाई वैध बनाउने प्रक्रिया अमेरिकी सीमा सुरक्षित भएको पक्का भएपछि मात्रै शुरु हुनसक्ने पनि खाकामा उल्लेख छ । अमेरिकी राष्ट्रपति ओबामाले संसदले यो प्रस्ताव पारित नगरे ह्वाईट हाउस आफैले विधेयक तयार गरी संसदमा मतदान गराउन सक्ने बताउनुभएको छ ।